گزشتہ سے پیوستہ

سَلمَۃٍ سَمَت (اَلسَّلَامُ)۔

اسم مقدس سلمتہ سمت کو ایک سو دس بار جس مریض لاعلاج پر پڑھیں گے اسے جس قسم کی بھی بیماری ہوگی دفع ہو جائے گی ، اس اسم مقدس کا با کثرت پڑھنا تمام تر بیماریوں کو دور کرتا ہے ، باوثوق اسناد میں مذکور ہوا ہے کہ جو شخص اس مقدس سلمتہ سمت کو چالیس دن تک ایک ہزار بار روزانہ پڑھتا رہے تو وہ مستجاب الدعوات بن جاتا ہے ۔ معقل بن یسار سے مروی ہے کہ اس اسم کا عامل و ذاکر اگر اس پر مداومت رکھتا ہے تو خدائے تعالیٰ سات ہزار فرشتوں کو اس کی حفاظت پر مامور فرماتا ہے اس سے پہلے اور پچھلے تمام گناہ معاف ہوجاتے ہیں وہ مرتبہ شہادت پر فائز ہو کر دنیا سے اٹھے گا کہا گیا ہے کہ جو شخص اس اسم مقدس کو اس کے حروف کے اعداد کے مطابق پڑھے اور اس عمل کے بعد جس حاکم و سلطان کے ہاں جائے گا اور جو آرزو رکھتا ہوگا پوری ہوگی اسم متذکرۃ الصدر کا ۲۲۵مرتبہ روزانہ پڑھنا اعداء و اشرار سے حفاظت کا سبب بنتا ہے ارباب خواص فرماتے ہیں کہ اگر اس اسم مقدس کے حروف کو الگ الگ کرکے چینی کے برتن میں مشک و زعفران سے لکھیں اور اسی اسم کے حروف کے اعداد کے مطابق دنوں تک پئیں تو ظاہری و باطنی علوم منکشف ہوجائیں ۔ اس اسم مقدس میں حفاظت و سلامتی کی خاصیت پائی جاتی ہے تحریر کیا گیا ہے درود پاک کے ساتھ تین مرتبہ پڑھ کر اپنے دائیں بائیں اور تمام جسم پر پھونک دیں اس عمل کو گھر سے نکلتے وقت بجالائیں گے تو شام کو گھر واپس پلٹنے تک ہر شر سے محفوظ رہیں گے اسی طرح اگر شام کو پڑھیں گے تو صبح تک محفوظ رہیں گے ۔ اس اسم مقدس کے خواص میں سے ہے کہ اگر اسے مرگی کے مریض پر گیارہ مرتبہ پڑھ کر دم کر دیں تو اسے فوراً آرام ہوگا ۔ ایک خاصیت اس کی یہ بھی ہے کہ اسے لکھ کر بطور تعویذ جس کے گلے میں ڈالیں گے وہ ہر مصیبت اور پریشانی سے محفوظ رہے گا ، کہا گیا ہے کہ یہ اسم مقدس حجاب عظیم ہے اسے سامان میں رکھیں تو وہ چوری سے محفوظ رہے گا اسی طرح اگر اس کے حروف کے اعداد کو شمس کی ساعت میں لکھ کر مال تجارت میں رکھے تو بہت نفع ہوگا ۔ امام ہرمس فرماتے ہیں کہ یہ اسم مبارک درحقیقت اسم اعظم ہے اس کے ملفوظی حروف کا مضاعف تداخل چار سو تراسی ہے اس کا جمعہ کی پہلی ساعت میں چاندی یا سونے کی لوح پر لکھنا اور لکھ کر اپنے پاس رکھنا عجائبات و غرائبات کے مشاہدہ کا سبب بنتا ہے اسم متذکرۃ الصدر میں محبت و عطف قلوب کی بھی بہت زیادہ تاثیر ہے ضرورت کے وقت ہرن کی جھلی پر لکھیں اور عود و عنبر کی دھوپ دے کر اپنے پاس محفوظ رکھیں جہاں اور جس محفل میں جائیں گے بے حد و حساب عزت و تکریم پائیں گے ۔