قمری منازل کے خواص اور اثرات ۔ کس منزلِ قمری میں کونسا عمل کرنا چاہئے

جفر آثار میں جیسا کہ آپ کے علم میں ہے کہ وقت کی اپنی ایک اہمیت ہے صحیح وقت پر بنایا گیا نقش سرعت سے اثر پذیر ہوتا ہے جس طرح دیگر باتوں کا خیال رکھا جاتا ہے اسی طرح قمری منازل کے خواص اور اثرات کی بھی اپنی بہت اہمیت ہے
قرآن حکیم میں منازل کے بارے میں خدا وند کریم نے ارشاد فرمایا ہے کہ
والقمر قدرناہ منازل ۔
اس بات کو نظر انداز نہ کیا جائے کہ خدا وند کریم نے دنیا کے نظام چار عنصر پر قائم کئے ۔
یعنی آتش ۔ باد ۔ آب ۔ خاک
تمام بروج ، منازل قمری ، ستارے ، ساعت اور حروف ان عنصروں کے زیر اثر ہیں اسے طبع اور مزان کے نام سے بھی موسوم کیا جاتا ہے اس بات کا آپ بھی تجربہ کر سکتے ہیں
یاد رکھیں کہ علمائے متقدمین نے اپنی عمر عزیز گزارنے کے بعد تجربہ کرکے آپ کے لئے راستہ بنایا ہے جن پر چلنا آپ کا کام ہے قمر کی زیادتی کے ساتھ ہر چیز بڑھتی ہے اور اس کے کم ہونے کے ساتھ ہر چیز کم ہوتی ہے یہ خداوند کریم کی حکمت ہے ۔ جس کو اس نے اس کے اندر رکھا ہے
یہاں یہ واضح کردوں کہ وہ افراد جو عمل کے شائق ہیں اور تاثیر پیدا کرنا چاہتے ہیں انہیں چاہئے عنصر کا کاص خیال رکھیں جو شخص ہر ایک عمل کو وقت پر کرے گا انشاء اللہ وہ کامیاب ہوگا کیونکہ اس علم کا یہی دروازہ ہے جس سے اس میں داخل ہوتے ہیں۔

شائقینِ عملیات قمری منازل کے خواص اور اثرات کو اچھی طرح ذہن نشین کرلیں

یہاں پر جو کچھ بیان کیا جا رہاہے اسے اگر نوٹ کرلیں تو اعمال کے سلسلے میں آپ کی محنت رائیگاں نہیں جائے گی
یاد رکھیں کہ قمر جس وقت جس برج میں ہو اس کے موافق عمل کرنا چاہئے
علمائے روحانیت ایک نسخہ بھی فرماتے ہیں کہ جب آپ کے پاس کوئی سائل آئے تو اس کا نام اور اس کی والدہ کا نام اور جو کچھ اس کا مطلب ہے ان تینوں کے حروف بسط حرفی کرلیں اور دیکھیں کہ اس میں کونسا عنصر غالب ہے پس جو عنصر غالب ہو تو جب قمر اس برج میں آئے تب عمل کرنا چاہئے ۔ بروج کی ماہیت وغیرہ کے لئے کتب کی جانب رجوع کر سکتے ہیں
سردست ہمارا موضوع منازل قمری ہے
عربی میں منزل اور ہندی میں نچھتر کے نام سے پکارا جاتا ہے یونانی نجوم میں ۲۸ منازل قمری مانی گئی ہیں جبکہ ہندی منجمین نے ۲۷ پر مان کر کسرات کو ترک کیا ہے ۔ قمر اندازاً ایک منزل میں ایک رات رہتا ہے ان منزلوں کے خواص اس قدر ہیں کہ ان پر لکھا جائے تو ایک کتاب تیار ہو سکتی ہے ۔لیکن یہاں میں ان کا مختصر تذکرہ کرتا ہوں ۔

قمری منازل کی فہرست میں سیارہ قمر کی پہلی منزل ، منزلِ بطین ہے

چاند کی پہلی منزل ، منزل ِ شرطین ہے ۔ اس کا منسوبی حرف الف ہے یہ منزل آتشی اور مذکر ہے جب چاند اس منزل میں ہوتو انسان کو سفر کرنا اور مسہل لینا بہتر ہے اس منزل میں دشمنی اور جدائی کے طلسم اور عملیات بڑا اثر کرتے ہیں شریک کار کے درمیان عداوت اور نفاق ڈلوانے کا موثر وقت ہے بھگوڑے انسان کو پابند کرنا بھی خوب ہے ۔

قمری منازل کی دوسری منزل ، منزل بطین ہے۔

چاند کی دوسری منزل ، منزل بطین ہے جس کا منسوبی حرف ب جبکہ مزاج بادی ہے ۔ عامل حضرات دفن شدہ خزانہ دریافت کرنے کے عمل کرتے ہیں زوجین کے درمیان نفاق جدائی ڈالنا ، طلسمات سحر اس کے علاوہ قیدی کو قید کرنے ، ملازم کو قابو کرنے انسان کو تکلیف پہنچانے کے اعمال سر انجام دئیے جاتے ہیں ۔

ثریا، قمری منازل کی تیسری منزل ہے

ثریا (حرف ج ) یہ آبی منزل ہے جب قمر اس منزل میں ہوتا ہے تو خلاصی محبوس ، عمل کیمیا فریقین کے درمیان محبت کا رشتہ پیدا کرنا آوارہ قسم کے جانوروں کو قابو کرنے کے اعمال تیار کئے جاتے ہیں ۔

دبران ، قمری منازل کی چوتھی منزل ہے

دبران (حرف د) یہ منزل خاکی ہے یہ نحس ہے جب قمر اس منزل میں ہوتا ہے تو اس وقت شر فساد یا کسی کو ہلاک کرنے ، بچھو یا سانپ کو باندھنے یا ایسے فرد کی حاضری جو گھر سے چلاگیا کے سلسلے میں اعمال تیار کئے جاتے ہیں ۔

قمری منازل – پانچویں منزل ہقعہ

ہقعہ (حرف ھ ) آتشی منزل ہے اس میں طلسم و اعمال برائے اصلاح اطفال ان کی تعلیم حصول فن براہ سلامتی مسافر، یا پھر محبت زوجین وغیرہ کے سلسلے میں کئے گئے اعمال نیک رہتے ہیں۔

قمری منازل -چھٹی منزلِ ہنعہ

ہنعہ (حرف و مزاج بادی) اس منزل میں جب قمر ہوتا ہے تو دشمنوں کو نقصان پہنچانے ، کھیت اور باغ کو تباہ کرنے ، ہواؤں کے اثرات کو زائل کرنے کے سلسلے میں زود اثر اعمال تیار کئے جاتے ہیں ۔

قمری منازل – ساتویں منزلِ ذراعہ

ذراعہ ( حرف ز مزاج آبی) جب قمر اس منزل میں ہوتا ہے تو تمام نیک کام کے لئے عمل کرنا ، مثلاً تجارت میں برکت ، دوستوں کی محبت ، کاموں کی حفاظت ، روپیہ نہ ٹھہرتا ہو تو اس وقت عمل کرنا چاہئے ۔

آٹھویں منزل ۔ منزلِ نثرہ

نثرہ (حرف ح مزاج خاکی) جب قمر اس منزل میں داخل ہوتا ہے تو طلسمات برائے تفریق ، طلسمات طیور ، دشمنوں و سرکشوں کی تباہی و بددعا کے سلسلے میں اعمال کئے جاتے ہیں ۔

نویں منزل طرفہ

طرفہ (حرف ط مزاج آتشی ) جب قمر اس منزل میں داخل ہوتا ہے تو اس میں جنگ و جدال کو روکنا ، مسافر کا تحفظ ، قیدی کی قید سے رہائی کے سلسلے میں اعمال کئے جاتے ہیں ۔

دسویں منزل جبہہ

جبّتہ( حرف ی مزاج بادی ) جب قمر اس منزل میں داخل ہوتا ہے تو تجار ت میں نفع حاصل کرنے کے لئے کسی کام کی بنیاد رکھنے کے لئے ، محبوس کی آزادی ، دشمنوں کے مکر و فریب سے نجات حاصل کرنے کے لئے اعمال تیار کئے جاتے ہیں ۔

گیارھویں منزل زُہرہ

زہرہ ( حرف ک مزاج آبی ) جب قمر اس منزل میںداخل ہوتا ہے تو قیدی کی رہائی ، درختوں کے پھل کی زیادتی ، تجارت میں ترقی ، کسی عمارت کی بنیاد رکھنا یعنی ثبات قدم ، وغیرہ جیسے کام کے سلسلے میں اعمال تیار کئے جاتے ہیں ۔

بارھویں منزل صرفہ

صرفہ ( حرف ل مزاج خاکی ) قمر جب اس منزل میں داخل ہوتا ہے تو تجارت میں فروغ ، مال تلف ہونے اور کسی انسان کو نقصان سے بچانے کے لئے ، کسی صنعت و حرفت کو سیکھنے کے لئے ، اور کسی شخص میں ہنر و صلاحیت قائم کرنے کے لئے نقوش تیار کئے جاتے ہیں ۔

تیرھویں منزل عوّا

عوّا ( حرف م آتشی ) قمر جب اس منزل میں ہوتا ہے تو مال و دولت میں اضافہ تجارت و زراعت میں ترقی ، بے گناہ قیدی کی رہائی اور سلامتی مسافر کے سلسلے میں طلسمات و اعمال تیار کئے جاتے ہیں۔

چودھویں منزل سماک

سماک ( حرف ن مزاج بادی ) جب قمر اس منزل میں داخل ہوتا ہے تو زوجین میں محبت اور پیار میں اضافہ کرنے ، دشمن کو زائل کرنے ، زراعت میں زیادتی امانت کو قائم رکھنے کے سلسلے میں عمل کئے جاتے ہیں

پندرھویں منزل غفرہ

غفرہ (حرف س مزاج آبی) جب قمر اس منزل میں داخل ہوتا ہے تو پریشانی سفر کو دور کرنے ، میاں بیوی کے تعلقات بحال کرنے ، نفرت کو محبت میں بدلنے کے سلسلے میں اعمال کرنے چاہئے ۔

سولہویں منزل زبانہ

زبانہ (حرف ع مزاج خاکی ) جب قمر اس منزل میں ہوتا ہے تو تجارت میں نقصان ، رفیق حیات کی جدائی کو روکنے ، رشتہ داروں کی مفارقت کو بحال کرنے اور دشمنوں کی دشمنی کو ختم کرنے کے سلسلے میں اعمال تیار کئے جاتے ہیں ۔

سترھویں منزل اکلیل

اکلیل ( حرف ف مزاج آتشی ) ۔ جب قمر اس منزل میں ہوتا ہے تو جانوروں کی اصلاح ، ان کی کثرت ، امارت کے ثبات و سلامتی مسافر کے سلسلے میں اعمال کئے جاتے ہیں ۔

اٹھارھویں منزل قلب

قلب ( حرف ص مزاج بادی ) جب قمر اس منزل میں ہو تو علم باندھنے ، دشمنوں پر حاوی ہونے ، حکام کو گرانے ،بقائے ملازمت ، اختلافات کو دور کرنے ، ثمر اشجار کو قائم کرنے کے سلسلے میں اعمال کئے جاتے ہیں ۔

انیسویں منزل شولہ

شولہ ( حرف ق مزاج آبی ) جب قمر اس منزل میں قیام کرتا ہے تو دشمنوں پر کامیابی ، دشمنوں پر عذاب ڈالنے مسافر کی حفاظت، کثرت زراعت ، قیام اقتدار کے سلسلے میں بنائے گئے اعمال موثر ہوتے ہیں۔

بیسویں منزل نعام

نعام ( حرف ر مزاج خاکی ) جب قمر اس منزل میں قیام کرتا ہے تو جانوروں کی اصلاح ، محبوب کو اپنی طرف رجوع کروانے ، قیدیوں کی مشقت دور کرنے ، سفر کو جلد اور اطمینان سے طے کرنے کے سلسلے میں موثر اعمال کئے جاتے ہیں ۔

اکیسویں منزل بلدہ

بلدہ ( حرف ش مزاج آتشی ) جب قمر اس منزل میں قیام کرتا ہے تو کثرت زراعت ، کثرت مال و مویشی ، حفاظت مسافر اور اس عورت کے لئے اعمال تیار کئے جاتےہیں جو شوہر سے طلاق کی متمنی ہو اور خاوند طلاق نہ دینا چاہ رہا ہو۔

بائیسویں منزل ذابح

ذابح ( حرف ت مزاج بادی ) جب قمر اس منزل میں ہوتا ہے تو امراض سے نجات ، دو شخصوں یا فریقین کے درمیان جدائی کو ختم کرنے یا کسی مرد یا کسی عورت کے فعل زنا کو روکنے ، بقاء ملازمت ، اور قید سے رہائی کے لئے اعمال تیار کئے جاتے ہیں ۔

تئیسویں منزل بلعہ

بلعہ ( حرف ث مزاج آبی ) جب قمر اس منزل میں ہوتا ہے تو اس میں مداومت امراض ،کسی کو مالی طور پر نقصان پہنچانے ، زوجین میں تفرقہ پیدا کرنے وغیرہ جیسے امور کے سلسلے میں اعمال کئے جاتے ہیں ۔

چوبیسویں منزل سعود

سعود ( حرف خ مزاج خاکی ) جب قمر اس منزل میں ہوتا ہے تو ترقی تجارت ، قید سے خلاصی ، یا ایسے امور جو بڑے کاموں سے تعلق رکھتے ہوں جیسے ٹھیکہ یا فیکٹری ، کارخانہ وغیرہ کے امور بخوبی سر انجام پائے ، کے سلسلے میں اعمال کئے جاتے ہیں ۔

پچیسویں منزل اخبیہ

اخبیہ ( حرف ذ مزاج آتشی ) جب قمر اس منزل میں ہوتا ہے تو حصار شہر ، دشمنوں پر فتح پانے ، دشمنوں کو مصیبت میں ڈالنے ، جاسوس یا ایلچی یا پیغامبر بھیجنے اور اسے کامیاب کرکے واپس لانے کے سلسلے میں ، شہوت کو باندھنے ، مکان کی بنیاد رکھنا نیز خلاصی قید کے سلسلے میں موثر اعمال کئے جاتے ہیں ۔

چھبیسویں منزل مقدم

مقدم ( حرف ض مزا ج بادی ) جب قمر اس منزل میں ہو تو الفت ، محبت ، اجتماع کے لئے ، حصول مقصد ، اگر کسی شخص کو قید ہونے کا ڈر ہو یا کسی شخص کو رنج و غم نے گھیر رکھا ہو ، تو اصلاح حالات کے اعمال کئے جاتے ہیں ۔

ستائیسویں منزل مؤخر

مؤخر (حرف ظ مزاج آبی ) جب قمر اس منزل میں ہو تو تجارت میں کثیر نفع ، زراعت میں زیادتی غلہ ، امراض کو سلب کرنے ، کسی کے پاس رقم جمع نہ ہوتی تو آمدنی سے خرچ زیادہ ہوجاتا تو یا پھر ازدواجی زندگی میں خرابی ہو یا پھر قیدی کی قید سے خلاصی مطلوب ہو تو اعمال تیار کئے جاتے ہیں ۔

اٹھائیسویں منزل رشا

رشا (حرف غ مزاج خاکی ) جب قمر اس منزل میں ہو تو کثرت مال و نفع ، تجارت ، امراض سے نجات ، امانت کو ضائع ہونے سے یا محفوظ کرنے ، مسافر کی سلامتی ، زوجین کے نفاق کو دور کرنے ، یا قید سے خلاصی کے سلسلے میں ، یا سمندری سلامتی کے سلسلے میں اعمال کئے جاتے ہیں ۔

قمری منازل سے منسوبہ دیگر عملیات تفصیل سے ان شاء اللہ تحریر کئے جائیں گے

ہم کوشش کریں گے وقتاً فوقتاً منازل قمری سے منسوب اعمال کو بھی پیش کرتے رہیں تاکہ شائقین علم میں باعث اضافہ ہو۔